من جربت الفطام الليلي بعد السنة؟

 "وليدك فات #العام ومازال ينوض 4 مرات في #الليل؟ 🍼😴 

كابوس نوضة الليل و #الحقيقة لي ما تقولهالك حتى وحدة😌..

 هاك '#الخطوات_السرية' من عند

 طبيبة أطفال وأم

 باش تنجحي في #الفطام_الليلي بعد العام (12شهر)بلا ما تحرميه من🤱 الحنان!

ب 7 خطوات ذهبية✨️✨️✨️ 

1- "فصل السرير" 

🛏️قبل ما تبداي تنقصي الرضاعة، لازم تفصلي سرير وليدك على سريرك.

 ماشي شرط تخرجيه من الغرفة، بصح لازم يكون عنده سرير مستقل خاص بيه.

 الطفل كي يكون راقد لاصق فيك، غير يتحرك يشم ريحتك وريحة الحليب، وعقله يطالب بالرضاعة تلقائياً 

 كي يبعد عليك بمسافة، راح ينقص هاد المحفز بزاف.

وعليها اصلآ ننصحوا باش تفصلوا الرضيع 👶 عليكم في الرقاد في سن أقل باش مايوالفش

2- شبعيه مليح في النهار 🍽️

تأكدي بلي راه يدي وجباته الصلبة كاملة ومتنوعة خلال النهار باش يسد حاجة الجوع البيولوجي وما يجوعش بالليل.

3- عشاء مشبع وروتين نوم جديد 📚

اعطيلو وجبة عشاء دافية ومشبعة وموراها الرضعة الأخيرة اذا حب يزيد يرضع .

و اصنعي لوليدك روتين جديد قبل النوم ما يعتمدش على الرضاعة كلياً، مثلا: 🚿 دوش دافي، تلبسيلو البيجامة، وتقراليلو قصة قصيرة بصوت حنين، او اقراي عليه وردك اليومي تع القرآن....

4- افصلي الرضاعة عن النوم ⏱️

ما تخليهش يرقد والثدي أو البيبرون في فمه كامل. كي يبدا يغفى ويسترخي، نحيها بشوية باش يتعلم يرقد وحدو بلا ما يربط النوم بمص الثدي أو بالبيبرون

5- مهمة الأب السريّة 🧔🥴

أو أي فرد من العاءلة آخر متعلق به الطفل كأخت كبرى ،جدة 

كي ينوض الطفل يبكي في الليل، إذا رحتي ليه أنتِ ويشم ريحتك راح يزيد يتمسك بالرضاعة.

 خلي الأب او هذا الفرد هو لي ينوض يطبطب عليه، يحضنه، ويحسسه بالأمان غير يامات الاولى ومنبعد غير يصرا الفصل خلاص مايوليش يلصق فيك .

6-بديل كأس الماء 💧

كي ينوض في الليل ويبكي، اعطيلوا يشرب شوية ماء في الكأس المخصص للرضع (ماشي البيبرون). 

إذا كان عطشان راح يشرب ويرقد، وإذا رفضها وعرفتي بلي حاب يرضع برك كعادة ماشي جوع، طبطبي عليه بلا ما ترضعيه.

7- تجنب الرضاعة التسكيتية بالنهار 🙅‍♀️

في النهار نقصي "الرضاعة اللي تسكتيه بها برك " (يعني كل ما يبكي أو يتقلق تعطي له يرضع باش يسكت) . 

عوضيها بالحضن أو اللعب. إذا تعلم يهدا في النهار بلا رضاعة، راح يسهل عليه يهدا في الليل بلا بيها.

آخر نصيحة ذهبية من عندي 🫡

الفطام الليلي يحتاج صبر وثبات من 3 إلى 7 أيام. اختاري فترة تكون صحة الطفل مستقرة (ماشي وقت تسنين أو مرض أو تغيير منزل او ختان ). 

وإذا بكى وليدك واستسلمتي وعطيتيله يرضع، راح يفهم بلي البكاء الطويل هو الحل ويزيد يتمسك بالعادة! كوني صبورة وقوية، وراح تنجحي 💪.